Building Timor-Leste

Back to all blogs
7

“Akuntabilidade Laos Deit Atu Fa’an kios”

“Ema la iskola ba akuntabilidade mos bele fa’an kios!”. Lia fuan ida ne’e mak hau rona husi vizinho no kolega sira iha tinan 1997 bainhira hau ramata hau nia iskolah iha SMAN 1 Dili ( agora sai hanesan Iskola Pre Secundaria 12 de Novembru Dili) hodi  kontinua ba iha Politeknik Dili no hili departementu komersio, programa akuntabilidade.

Iha momentu ne’e ba, hau nia vizinho no kolega sira hatete katak istuda akuntabilidade ne’e la importante tanba tuir sira nia hatene akuntabilidade ne’e  hanesan materia ida nebe’e hanorin ema oinsa atu fa’an sasan deit. Sira salenta liu tan katak ema ne’ebe la iskola mos bele fa’an sasan, tanba ne’e lalika lakon tempu hodi ba istuda area ida ne’e.

Maske hetan reaksaun ne’ebe la dun positivu ba area ida ne’e, maibe hau esforsa an duni  hodi ramata Diploma 2 (D2) no kontinua foti S1 iha Surakarta, Indonesia no ramata iha 2003. Bainhira akaba hau nia istudu, hau komesa servisu hanesan Finansa hamutuk ho instituisaun balu hanesan Statistik, TIDS, IFRC, Embaisada Australia no ikus liu ho ONG ida ne’ebe hakbesik an liu ba iha empresariu lokal ho naran Peace Dividend Trust (PDT). Ho esperensia servisu hirak ne’e komesa fo  hanoin  mai hau katak akuntabilidade  lao’s deit atu fa’an kios, maibe bele  mos influensa makas ba iha desemvolvementu ba Timor Leste.

Joven sira ne'e be interese istuda Akuntabilidade iha IOB

Durante iha  servisu nia laran, hau nota katak ema Timor oan ladun barak mak iha espesialidade iha area akuntabilidade. Hau hare iha institusaun barak, ema Timor oan kaer servisu nudar Finansa,  iha deit  nivel kraik no laiha kbi’it ba sira atu halo desijaun ou influenza desijaun ruma. Iha nivel as hanesan; manajer, advisor, analisador no auditor sempre husi ema liur. Hau fo izemplu hanesan ONG sira no mos ita nia governu rasik mos uja auditor husi rai liur hanesan : Ernest & young husi Australia,  PriceWaterHouseCooper husi Australia no Deloitte husi New York. Organizasaun hirak ne’e  halo audit ba gestaun no sistema finance iha institusaun Governu nomos ONG sira iha Timor nia laran. Aktividade audit ne’e gasta osan lubun bo’ot ida maibe la dun involve ema Timor oan iha aktividade ne’e nia laran. Tamba Timor oan ladun involve no mos menus kuinesementu iha area ida ne’e, ita sempre fiar no halo tuir deit ba reportajem sira nebe auditoria husi rai liur  rekomenda hela ba ita.  Mosu perguntas balu katak: reportajen sira nebe’e ema fo ne’e  tranparansia no  imparsial ka lae ? sistema nebe sira rekomenda ne’e kondis duni ho ita nia situasaun ka lae ? se karik iha influensa politika husi partidu ou parte ruma entaun se mak bele hatene katak rekomendasaun hirak  ne’e lalos, ou la tuir ho kondisaun real iha rai laran ?.

Iha parte seluk ita hare katak komersiante Timor Leste mos ladun iha  kuinesementu iha area akuntabilidade. Sira ladun hatene kona ba oinsa halo relatoriu finansa nebe diak. Akuntabilidade sai hanesan aspektu importante ida atu kompania sira nia aktividade bele sustentavel no mos bele kompete iha nivel lokal no internasional. Relatorio finansa nebe diak bele ajuda kompania sira hodi trasa sira nia planu strategiku hodi nune kompania bele sai forsa liu tan.

Atu habelar no haforsa industria iha rai laran, persija rekursu humanu ne'e be sufisiente

Strutura industria iha Timor Leste hatudu katak, to’o iha Desembru, tinan 2010 numero empresariu hamutuk 3,050 nebe’e aktivu halo sira nia aktividade. Husi numero sira ne’e, 98,42% tama ba iha kategoria industria ki’ik no mediu (dadus husi PDT blogspot www.buildingmarkets.org). Maske nune’e, agora dadaun empresariu ki’ik no mediu sira barak mak hetan difikuldade atu aksesu ba kreditu tanba iha problema ho sira nia sistema akuntabilidade. Oinsa banku ou mikro finansa bele interese no fo kereditu ba sira se koandu sira nia relatoriu finansa laiha?. Ida nee hatudu katak akuntabilidade laos deit persija iha institusaun governo, ONG no kompania boot sira, maibe industria ki’ik oan sira mos persija duni ema akuntabilidade atu ajuda sira nia aktividade.

Hare ba iha menus rekursu humanus  liu-liu iha area akuntabilidade nebe’e hamosu probelema sira hanesan mensiona iha leten, maka hau hanoin katak Akuntabilidade ne’e area ida nebe importante mos ba prosesu  desemvolvementu iha Timor Leste. Ema Timor oan tenki involve an iha area hotu hotu. Timor oan labele depende hela deit ba ema liur maibe tenki sai mos hanesan autor ba desemvolvementu iha rain rasik.  .  Ho hanoin hirak nee maka  iha fulan Maio 2009 hau husik hela hau nia servisu nudar Office Manager iha ONG Peace Dividend Trust no kontinua foti programa Master in Accounting iha Universidade Victoria iha Melbourne Australia, atu nunebe’ele aumenta liu tan hau nia kuinesementu no kapasidade iha area ida nee.

Ikus mai, hau hanoin persija duni atu habelar programa akuntabilidade iha Timor Leste. Timor oan sira nebe’e interese iha area ida ne’e, bele hamrik hamutuk hari’i Asosiasao Akuntabilidade Timor Leste. Karik Asosiasao ne’e bele kapasita joven Timor Leste nebe’e hakarak istuda iha area akuntabilidade. Iha  parte seluk, bele mos responde ba nesesidade governu no seitor privadu nebe persija servisu area ida ne’e nian. Asosiasaun mos bele buka meus atu kolabora ho organizasaun Akuntabilidade Internasional hanesan: Ernest & Young, Deloitte no PriceWaterhouseCooper, atu nunebe’ele mos kapasita Timor oan sira hodi kria standard akuntabilidade nebe’e kondis ho lalaok Timor nian nomos rekuinese iha internasional. Timor oan sira sei senti urgulho tanba bele kontribui ba desemvolmentu nia nasaun rasik liu husi kapasidade nebe sira iha.

Tags , ,

7 Comments

  1. Korajen ba Timor oan sira hodi buka matenek iha areas hotu hotu no buka esperensia iha rai tomak.
    Primu hau koko atu add ita iha hau nia lista Fb bele responde ka ?

  2. Aprecia ba Belun Apolinario ninia istoria no esperencia neebe sai hanesan motivasaun ba Timor oan tomak liliu ba sira neebe sei tuur iha aulas eskola ka Universitariu.

    segundu hau fo komenta oituan konaba presepsaun sociadade neebe koalia katak kontabilidade nee la presija, pressepsaun nee hanesan dezafius ida no mos motivasaun hodi buka kuinece area siencia diak liu tan i rejultadu Apoli hetan duni.

    Terceiru; hau aprecia ba ita boot nia hanoin atu kria kontabilidade neebe mak involve ema Timor Oan i kapacitajovem sira hodi kuinece diak liu asuntu ne.
    Maibe hanesan ema ekonomia, hau fo sujestaun katak bele ka lae forma deit Akuntan Publiku?

    Kuatru presija dunia terobosan sira hodi bele garante sustentablidade makina ekonomia liliu negocio kiik no bisnis sira neebe relevante,,,,,,,,, Ikus liu hanesan pesoal hau fiar ita nia kapacidade hodi desenvolve asuntu nee, i parte ida hanesan kontribuisaun matenek Timor Oan hodi bele apoia malu…Obrigadu no kontinua

  3. Mas Rio, terjemahin donk..kayaknya seru tuh !

  4. Obrigadu ba sharing Esperensia no liafuan Motivasaun balun nebe hato’o husi Maun Apolinario. Tuir hau nia hanoin no observasaun katak, los duni, motivasaun joven sira nian hodi hili ka foti Jurusan iha nivel Universidade mak ladauk klaru, balun tamba hanoin dehan Ekonomi management ne’e barak ona, entaun ita foti to’ok fali Akuntansi, maibe no fim lahanoin se nia impaktu ba iha merkadu de trabalho, oinsa. Joven balun mos foti jurusan sira hanesan politik mak barak liu ba hirak nebe foti IPS iha SMA, sira la konsege hanoin katak nia implikasaun iha merkadu de trabalho ba iha aban bainru oinsa. balun fali tamba nia kantor ka perusahaan mak haruka sira ba foti Akuntansi iha Universidade.

    Tamba ne’e hau hanoin importante tebes, atu kontinua share ba iha Joven sira ohin loron liuhusi meius sira nebe adekuado hodi motiva ka enkoraza joven sira hodi hili jurusan sira nebe bele garantia iha merkadu trabalho inklui mos Akuntansi.

    Obrigadu

  5. juli lobo says:

    obrigadu ba maun apolinariu nb fo motivasaun ba timor oang nb iskola ou agara tur iha universidade tanba hw mos rona husi kolega balu nb barak mak ladung comprede akuntabilidade, hw fo hanoin katak akuntabilidade ne persija iha area hotu-hotu, hw fo hanoin katak laiha aktividade ida kona ba akuntabilidade wainhira iha area ne ema sei lapersija osan tan ne ita hotu hanoin katak iha fatin nb deit ema hotu persija entaun akuntabilidade mos sei lao, se iha akuntabilidade mk ema bele hatene osan ne ba nebe, ou tama husi nb,,,korupsaun agora dadauk ne barak tamba povu barak mk seidauk hatene los.

  6. helderquintao says:

    loron diak bro,…..kleur lahasoru malu,derepenti bro mos bo’ot los ona hhhh,bro atu koalia kona ba akuntabilidade ne’e hau senti bro nian kedas,basta labele koment fonan demais,…………..salam ba familia

  7. David says:

    Tempo agora….se mak la hatene komputador, kuaze ema hotu hatene ona komputador maski iha ema balun so iha kunhesementu deit maibe seidauk bele uza. Alen de buat sira ne’e, iha komunidade akademia, estudante, funsionariu, kompania privadu no seluk-seluk tan komputador sai ona parte ne’ebe importante hodi bele ajuda hala’o servisu ho efisensia. Maibe se kuando iha loron ida iha ema balun hanesan ita nia oan, kolega, tiu, ou karik mos aman sarani husu mai ita saida mak komputador ne’e….eeemmm…….karik ba sira ne’ebe mak foti kursu iha area Informatika sei bele atu esplika maibe oinsa ho ita ne’ebe baibain deit. Hau sente utilizador komputador barak mak seidauk bele atu esplika. Bazeia ba buat ne’e, hau hakarak fahe informasaun kona ba komputador ne’e.

Leave a Comment


Rss Feed Tweeter button Facebook button Youtube button